Pamjet mahnitëse të publikuara për herë të parë nga National Geographic  tregojnë dhjetëra pinguinë të vegjël që zhyten me guxim nga një shkëmb i lartë 15 metra për të notuar në ujërat e ftohta të Antarktidës për herë të parë.

Kineasti fitues i çmimeve të National Geographic, Bertie Gregory, kaloi dy muaj duke gjurmuar një koloni prej 10,000 pinguinë në Gadishullin Antarktik dhe pati fatin të kapte skenën e pazakontë me lentet e tij, siç tha ai për “Good Morning America”.

“Kur zogjtë bëjnë zhytjen e tyre të parë, zakonisht hidhen në det nga rreth gjysmë metri akull. Kemi vënë re se shumë zogj i kanë anashkaluar ato pika për të shkuar diku tjetër. Kështu që përdora dronin për të parë saktësisht se çfarë po ndodhte dhe kuptova se ata po mblidheshin në buzë të një shkëmbi të madh 15 metra të lartë. Më pas ata filluan të hidheshin një nga një për të bërë zhytjen e tyre të parë në Oqeanin Jugor”, tha Gregory duke përshkruar skenën e mrekullueshme.

Në videon e publikuar në YouTube nga National Geographic, pinguinët shihen duke u afruar me hezitim buzë shkëmbit. Papritur, njëri prej tyre hidhet në boshllëk dhe bie në ujë me një spërkatje. Pak më vonë ai duket se po largohet shëndoshë e mirë me not. Të tjerë zogj ndjekin shembullin, duke u zhytur nga lart për të shijuar banjën e tyre të parë.

Gregory shpjegoi se ai vetë ndihej nervoz duke parë skenën, pasi kishte copa të mëdha akulli që notonin në ujë dhe përplasja me to “do të ishte sikur të binte mbi beton”. Megjithatë, thotë ai, pinguinët e vegjël dolën menjëherë në sipërfaqe duke notuar, edhe pse nuk e kishin bërë kurrë më parë në jetën e tyre.

Sipas New York Post , pamjet mahnitëse të Gregory që tregojnë pinguinët e vegjël që zhyten në shkëmb për herë të parë do të përfshihen në dokumentarin “Secrets of the Penguins”premierë në Ditën e Tokës (22 Prill) 2025

Burimi informacionit @BalkanWeb: Lexo me shume ne : Bota Sot News botasot.co