Një djalë 15-vjeçar është arrestuar pasi një peshkop dhe disa njerëz që shkonin në kishë u goditën me thikë gjatë një predikimi në Sidnei. Ngjarja ndodhi të hënën në mbrëmje në kishën Christ The Good Shepherd në periferi të Wakeley.
Të paktën katër persona u goditën me thikë, por policia tha se asnjë nga goditjet nuk rrezikonte jetën e tyre. Incidenti shkaktoi trazira pasi qindra u mblodhën jashtë kishës, duke u përleshur me policinë – dy prej të cilëve u plagosën. Automjetet u dëmtuan pasi njerëzit hodhën gurë, tulla dhe shishe dhe, sipas agjencisë së lajmeve Reuters, policia hodhi sprej piper.
Dëshmitarët thanë se njerëzit e mbledhur po kërkonin që sulmuesi të nxirrej jashtë. Ndihmës komisioneri në detyrë i Uellsit të Ri Jugor, Andrew Holland tha se i dyshuari 15-vjeçar po trajtohej për plagët në dorë. Ai shtoi se ishte dërguar në një vend të sigurt. Goditja me thikë vjen disa ditë pasi gjashtë persona u vranë në një qendër tregtare në Sidnei. Sulmuesi më vonë u qëllua për vdekje nga një oficer policie.
Nuk ka asnjë sugjerim që dy ngjarjet janë të lidhura.
Peshkopi i sulmuar të hënën u emërua nga mediat lokale si Mar Mari Emmanuel.
I shuguruar nga Kisha Ortodokse Asiriane në vitin 2011, ai shihet si një figurë popullore dhe e diskutueshme. Predikimet e tij kanë marrë miliona shikime në rrjetet sociale.
“Kishte kaq shumë zemërim sepse peshkopi është i dashur prej tyre, ai është i dashur nga unë gjithashtu, ai predikon për Zotin dhe ne e duam Zotin,” i tha Reuters banorja Canny.
[embedded content]
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co
