Një ish-modele, e cila për pak sa nuk vdiq duke u përpjekur të kuronte kancerin e saj me një dietë me lëngje, ka paralajmëruar të tjerët që të mos “shkëputen” nga këshillat tradicionale mjekësore dhe të përpiqen të marrin informacione alternative në internet.

Irena Stoynova shpenzoi 2000 £ për shtrydhëse frutash dhe do të shpenzonte deri në tre orë në ditë duke përgatitur vakte të lëngshme për të nesërmen, duke besuar se do ta pastronte atë nga limfoma jo-Hodgkin.

39-vjeçarja u diagnostikua në qershor 2021 kur mjekët rekomanduan që ajo të merrte trajtim konvencional, por ajo vendosi të ndiqte këshillat e njerëzve për suksesin e terapive alternative në internet. Zonja Stoynova, nga Crondall në Hampshire, tha se ajo iu nënshtrua një diete me lëngje për dy vjet e gjysmë, por gjithashtu provoi një dietë me ushqime të papërpunuara, agjërim me ndërprerje, zierje të barishteve dhe çajëra të veçantë.

Ajo tha se e këshilluan të fillonte kimioterapinë, por iu drejtua internetit për të gjetur këshilla alternative dhe “gjithçka filloi prej andej”. Ajo tha se dëgjoi një burrë me qindra mijëra ndjekës në mediat sociale, i cili pretendonte se trupi mund të “shërohej” përmes një ndryshimi radikal të stilit të jetesës dhe dietës. Zonja Stoynova tha se ajo u bë një “fanatike” e dietave të ndryshme dhe terapive alternative.

“Nuk u ndala, isha aq e dobët. Kisha mungesë gjumi dhe halucinacione, nuk kisha fuqi as të hapja derën. Nuk mund të merrja frymë sepse kishte lëngje në mushkëri, humba rreth 20 kilogramë për shkak të dietës”.

Mjekët thanë se zonja Stoynova ishte në prag të vdekjes kur u dërgua në spitalin Frimley Park me ambulancë në maj të vitit të kaluar. Mjekët i thanë asaj se ka të ngjarë të vdiste pa trajtim për kancerin që ishte faza e tretë, por zonja Stoynova vazhdoi të refuzonte për disa ditë para se të pranonte të merrte kimioterapi. Mjekët përshkruan biseda “zhgënjyese” me të, por përfundimisht, pas 10 ditësh në spital, ajo pranoi të fillonte kimioterapinë.

Burimi informacionit @BalkanWeb: Lexo me shume ne : Bota Sot News botasot.co