Ka shkaktuar keqkuptime deklarata e presidentit polak, Andrzej Duda, i cili deklaroi se gadishulli i Krimesë është një rajon specifik dhe se nuk mund të thoshte nëse Krimeja e aneksuar nga Rusia do të rimerrej nga Ukraina.
Krimeja u aneksua nga Rusia në vitin 2014, një veprim që nuk njihet nga shumica e vendeve të tjera.
Duke folur për kanalin ”Kanal Zero” në YouTube, Duda tha se ai nuk e dinte nëse Ukraina do të ishte në gjendje ta rimerrte Krimenë, pasi gadishulli ishte “specifik edhe për arsye historike”.
”Sepse, në fakt, nëse e shikojmë nga një këndvështrim historik, ajo ka qenë nën kontrollin e Rusisë në shumicën e kohës”, shtoi ai.
Vasyl Zvarych, ambasadori i Ukrainës në Poloni, ka reaguar dje ndaj deklaratës së Dudës në platformën e mediave sociale X duke theksuar se “Krimeja është Ukrainë. Është dhe do të mbetet e tillë”.
”Pushtimi i përkohshëm i Krimesë nga Rusia është një krim lufte për të cilin do të dënohet”, shtoi Zvarych.
”Çlirimi i Krimesë është detyra jonë e përbashkët me botën e lirë. Ne, pa dyshim, do ta bëjmë këtë. Ne besojmë dhe veprojmë së bashku”, theksoi ai.
Radoslaw Sikorski, ministri i Jashtëm i Polonisë, reagoi gjithashtu në platformën X, dje në mëngjes.
“Polonia njeh pavarësinë e Ukrainës brenda kufijve të saj të vendosur ndërkombëtarisht, të cilët janë konfirmuar vazhdimisht nga Federata Ruse duke filluar nga traktati i 19 nëntorit 1990, përmes Memorandumit të Budapestit të 5 dhjetorit 1994 dhe traktatit kufitar të 28 janarit 2003”, shkroi ai.
Pawel Kowal, një deputet nga grupimi qeverisës i Koalicionit Qytetar, i cili do të bëhet komisioneri i qeverisë për rindërtimin e Ukrainës, i tha transmetuesit të radios RMF FM të shtunën në mëngjes se “historitë për Krimenë ruse janë të pakuptimta… nga ata që nuk e dinë historinë”.
“Krimeja është një pjesë integrale e Ukrainës, e cila ka autonomi rajonale, të cilën pak njerëz e dinë, të përfshirë në kushtetutën e Ukrainës. Është shumë autonome brenda Ukrainës, ka një parlament të veçantë, një qeveri të veçantë. Historikisht, ky është një vend ku Tatarët e Krimesë jetuan”, tha ai.
Sipas Kowal, kushdo që mendon se Krimeja është ruse është i ftuar në një debat historik dhe me siguri do ta humbasë atë.
“Kjo është thjesht marrëzi e përhapur nga propaganda ruse”, shtoi ai.
Më vonë të shtunën, presidenti Duda iu drejtua agresorit dhe pushtuesit rus.
”Sulmi rus në Ukrainë dhe pushtimi i territoreve të njohura ndërkombëtarisht të Ukrainës, përfshirë Krimenë, është një krim. Kjo luftë nuk mund të përfundojë me një fitore ruse”, tha ai.
Sikorski reagoi ndaj postimit të Dudës, në një konferencë shtypi, të shtunën në Bruksel.
“Presidenti sqaroi fjalët e tij dhe të gjithë mund të kenë një rrëshqitje të gjuhës”, u tha ai gazetarëve.
Sikorski shtoi se sqarimi ishte “në përputhje me qëndrimin e qeverisë” dhe se “çështja ishte mbyllur”.
”Të gjithë bëjnë gabime. Më duket se simpatia e presidentit Duda për Ukrainën është e padiskutueshme”, theksoi ai.
Krimeja është një gadishull midis Detit të Zi dhe detit Azov, i diskutueshëm midis Ukrainës dhe Rusisë.
Në vitet 1991-2014 ishte një republikë autonome e Ukrainës së pavarur.
Sipas ligjit ndërkombëtar, ajo i përket Ukrainës.
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co
